I Love My Jean

Musik: Aurelio | Text (schottisch): Robert Burns († 1796)

Of a‘ the airts the wind can blaw
I dearly like the west
For there the bonie lassie lives
The lassie I lo’e best:

There’s wild-woods grow, and rivers row
And mony a hill between
But day and night my fancys‘ flight
Is ever wi‘ my Jean

I see her in the dewy flowers
I see her sweet and fair
I hear her in the tunefu‘ birds
I hear her charm the air

There’s not a bonie flower that springs
By fountain, shaw, or green
There’s not a bonie bird that sings
But minds me o‘ my Jean